ADAT NAGORI KOTO BARU SIMALANGGANG / CAMPAK KA OMPEK
INI CATATAN ULANG SIAR TUO BARAKA SUDUK SAMBILAN TOBEK PANJANG . ANDA DAPAT MENGHUBUNGI KAMI ! KLIK TOMBOL BERIKUT INI :
CAMPAK NAN KA OMPEK.
Baa nan adat istiadat , Manuruk kato pusoko iyolah kato undang-undang.
Mancampak Tibo kaulu .Konailah anak udang udang.Apo cupak dek pangulu.Bakumain undang-undang.
Tiok Luak Jo Lareh, tiok koto Jo Nagori ,Ado mufokat nan tinggi iyolah :
Mufokat Rajo (ka4 suku) jo Pangulu , Manti jo Dubalang, Malin jo codiak pandai (Codiak pandai, jinih nan ompek, Imam Bila, Kotik jo ngku luma (dubalang nagori) jo tuo baraka.
Di dalam Luak Jo Lareh, dalam koto Jo Nagori di pasakutuan manusia, mufokat nan tumbuah mambori lazat pado satongah hati anak Nagori, saroto bapakai Pulo undang² nan umum di dalamnyo nak manyonang dek anak kamanakan, Kok rancak nampak di Liek, kok manih dapek di raso, lomak lai talulua, kok ka ilia olah sarongkuah dayuang, kamudiak sarontak galah,
Iyo rancak Nagori dek pangulu, Sakato lahia Jo batin. Iyo Rancak Nagori dek nan Tuo nan mamogang kato pusoko ,ba naroco bungka nan samo (piawai),
Elok topian dek nan Mudo, Mudo kuek manorang Jo manyiangi, Toguah mamocik buek , buek pangulu Jo nan Tuo,
Elok pokan dek Juaro, Rami pasa dek urang manggaleh , Pandai barogo Jo manilai, Tau batulak Jo barayiah, Samo Sonang kaduonyo.Indak elok dek awak Sorang.
Dek kampuang barajo ka mamak,
Tibo di topian nan kurang suci, Bicaro Pulang ka nan Mudo ,
nan batulang kuek, nan batalingo nyoriang, nak Tau di bayang kato sampai.
Tibo bagaduah dalam pokan, Bicaro pulang ka urang manggaleh, di Liek hukum nan ompek,
ompek Pulo parkaronyo,
1, Hukum awa di awa an
2, Nan akhia di akhia kan.
3, Hukum lahia di lahiakan.
4, Hukum batin batinkan juo.
Tibo kusuk nan indak salosai nan tumbuah di balai Jo galanggang,
Bicaro pulang ka Juaro.
Di Liek hukum nan ompek parkaronyo.
1, Hukum badakala.
2, Hukum baramo.
3, Hukum Basamo.
4, hukum Samato.
Dipandang alam nan bajalan, Dalam adat di Nagori kok tumbuah kilaf Di MUSOJIK,
Bicaro pulang ka alim ulama, jinih nan ompek Kito nan Kito godangkan.
Pandai ba Hadist Jo ba Dolia, Di dalam kitab Jo Sunnah,
Malin Bakieh Jo ba Ijma', Kitab nan ba ayat ayat, Sunnah nan ba bab-bab. Surek nan banubuat Jo basummum, balopa Jo makna,
Ado undang nan biaso , Ado undang nan tasuruak, Di pandang dek Alim Jo jahid, di timbang kuek Jo lomah, di pocik hukum nan wajib, nan jadid mustahil di pagunoan, Hukum Alloh taala nan bakakuan.
Kok basalahan masa Jo masa, babantah Bonang Samo Bonang,
di cari hukum di kitabullah, di lakukan ijtihad,
Baitu undang undang nyo, Baitu lotak Jo barihnyo, adat lamo pusoko usang nan indak buliah di rubah lai.
ADAT ISTIADAT.
Adat istiadat di bagi 3 parkaro.
1, Adat istiadat, Parasaan nan di kondak i, manuju kahalusan Budi nan bayiak.
2, Aka Jo Bicaro.
Aka manjala, Budi nan marangkak,
Usaho nan manuntuk ulemu.
Pocik paham na tabagi.
Angan nan mang gilo.
Larek siang malam, pontang Jo pagi.
Indah lupuk tiok kotunyo,
Timbang manimbang kalobiah an.
Cinto mancinto kabayiak an,
Tuah cinto kamogah an.
Kayo Suko Jo pujian.
Dari ciek nak duo, batukuak batambah sampai baka lobiah an.
Ateh ponuah nan balimbak,
Itulah sifat nan Godang panjang.
Uwewh² Jo angan tak basuo, Tumbuah Cilako dek Basilang.
Bak kato rang Tuo juo.
Barang siapo nan mambuek , maikrar Jo lidah, batas diak kan Jo hati, Mako ta cobua sa olun jatuah,
3. Amal istikmal ,
Cupak juo namonyo, pa hubuang syarak Jo adat,
Indak dek hawo naposu nan bapantang maliek dunia,
Pantang ka rondahan dek nan lain.
Indak pueh dek nan elok, indak posai dek nan rancak, Samo mancinto Kayo Jo Pujian.
TOMPEK SALAH.
Talotak pado 4 parkaro.
1, Salah pado Adat. Di hukum Jo ba agak agak.
2, Salah pado syarak.
Ba ma'af-ma'afan bilo salah pado manusia. Mamintak Ampun Jo tobat pado Alloh SWt.
3, Salah pado Cupak, Sosek kumbali, Talangkah kumbali.
4, Salah Jo Undang.
Ba dondo sampai Tabuang.
LARANGAN NAN OMPEK.
1. 6 Larangan adat
-Salah tariak. Maambiak kaku asa an , duduak nan Samo rondah , sarupo mamak Jo bapak
- Salah makan, Nan sarupo pipik makan makan Onggang, makanan mamak di makan dek kamanakan,
-Salah Jua. Manjua korong Jo kampuang indak di Rogo nan bapatuk an.
-Salah hibah , Mamborian pusoko indak ateh mufokat sagalo warih.
-Salah Kato. Kato nan pakatoan di lua dari muluk nan manih , jauah dari sopan Jo santun.sahinggo sakik hati saroto malu urang nan Mandonga.
Bacaruk Jo baamun saroto mamaki dalam rapek,
-Salah kurenah. Sipat angkuah, sombong saroto manakah nakah.
Sahinggo mambori malu Jo hino, saroto baku lompang di majilih rapek.Juo mambori sakik hati urang lain, katiko naik rumah tanggo urang indak Ado nan bajopuk, indak Ado nan ba anta, indak Ado nan ba usua Jo pareso.
2, 6 Larangan syarak.
- Ma ontian Suriah sari'at , mangarojoan Togah agomo ,
-Ma Upek Jo Takobua.Bakoba Jo nan buruak sipat tabiat urang lain di balakangnyo. Sahinggo sakik hati atau malu urang nan di khabari . Suko mambangga Jo manggodang kan diri ateh sasamo makoluak Alloh SWT, umat Rasulullah SAW
- Lobo Jo Ria. Nak dek awak surang sajo. Tagiah baama tagak dek di Liek urang , kaduonyo Karojo nan ponuah Jo Ama nan sio²
-Kazib, Kisiak Jo Khianat
Takuk urang KA barubah elok Jo Sonang,
Mailangan pitaruah.
- Manalongkai dalam Iddah.Nikah dalam Maso iddah
-Nikah indak ba Wali. Kawin lari ba duo².
3, 8 Larangan cupak.
- Manyolang indak mangumbalian
- Bautang indak nomuah mambayua.
-Salah nan indak omuah di hukum.
-Kusuk nan indak nomuah di salo Sai an.
-Bamiang indak omuah di kikih, bagabuak tak omuah di jontiak
- Baka botulan nan indak omuah bakakuan.
-Indak omuah sa Iyo Jo sa tido.
4, 12 Larangan Undanh-Undang.
- Samun sokah Padang badarah
-Tikam bunuah bangkai tajelo.
- Upeh racun batabuang sayak
-Dago dagi tagomoa urang
-Sumbang salah laku parangai.
-Lancuang kicuah batalingantang
--Robuk rampeh
-Tipu tepok bakanyataan.
-Topuak tanpa nan babori Bokeh
-Siuk baka bapuntuang suluah.
-Rampok rompak babuah tangan.
Tali undang Tuduah nan salapan.
1Tuduah
2, Cemo
3, Tambang
4,Cicak
5,Ampia ba tunggu an.
6, Jauah ba hambat an.
7, Adia bapakai
8, Cabua ba buang.
Nan mandapek an Tuduah, Onam parkaronyo.
1, Talolah Jo takoja, Sikotu nan.mambuek jaek, bapi 'ia Salah pado sanjato di tubuahnyo, Pagi hari datang nan taniayonka pangulu, diparesi asa usua luko, tatorangkan asa usua lopeh dari parkaro, indak tatorang llangsuang tatuduah.
2, Tatanndo tabitia.
Dapek barang urang nan taniayo pado seseorang, Mako urang tu tatuduah.
3,Taikek ,Tatuntuang .
Sirunciang tanduak,
Sibongkak Koniang Baduto muluknyo, Katiko urang kahilangan inyo bamalam di rumah urang lain, kotu di pareso indaklah sarunciang tanduak bamalam di rumahnya, Katiko kajadian tajadi, Mako si Koniang bongkak konai Tuduah..
4. Cincang tarogeh, Sakotu nan si jaekko manorangkan ,mami'ilkan luko di tubuahnyo, saroto Jo tarogeh obuaknyi, tali gkek pakaiannya,, di pareso dek pangulu dari Mano asa luko, kalau tatorangkan , urang tu di Tuduah.
5. Tambang Taciak..Dapek barang urang nan kahilangan pado urang mamboli, Mako di pareso Pangulu padi urang mamboli, Kalau tatorangkan Ciak bajalan pado urang nan manjua,kok indak tatorangkan ,tambang balantaj Anyo lai, indak buliah ma indak lai.
6, Tatangkok Tangan, Kotu urang jaek mami'ilkan salah, dapek barang nan di tariak nyo saroto dirinyo, tubuahnyo, Itu manamoan dapek musang Jo ayamnyo.
JALAN CEMO .
-1, Ba Suriah bak si Posan, iyolah kotu urang kahilangan basuo urang itu ma ngapik, mamikua, manjujuant Mako urang tu ba CEMO.
2, Jojak barunuk, Hilang Jojak di ateh kampuang, Di runuk mangko basuo di Nagori urang, Mako urang tu di CEMO.
3, Tabayang tatabua, Dek Khabar Jo Tando nan Adi , Mako urang tu Di CEMO.
4, Baki condong Mato urang nan banyak,
Si runciang Tanduak, Sibongkak Koniang, Sa olun urang kahilangan hidup dalam kmiskinan, sasudah urang KA hilangan , sirunciang tanduak, Jo Sibongkak Koniang hidup ponuah kekayaan, Bilo PANGULU mamariso, kok tatorangkan lopeh, kok indak CEMO di muko adat .
Kotorongan undang nan12.
Samunn Sagalo pi'il , perbuatan nan manyakiti tubuah ,untuak mancari kauntungan sacaro ba Sangajo.
Saka , Sagali pi'il perbuatan nan ma hilang kan nyawo, Sangajo untuak kauntungan.
Upeh ,Sagalo makanan nan manyakiti tubuah.
Racun, Sagalo makanan nan mahilangkan nyawa.
Maliang, Ma ambiak harato urang, sakatiko urang punyo indak tahu.
Curi Samo nyo Jo maliang.
Dago maubahi adat nan Ado.
Dagi , mambuek hirau pikuak, birau ba irau dalam Nagori
Sumbang, mambuek pajarajaan nan indak samparono.
Salah, Laki ² nan manyarotii parampuan nan bukan istrinya.
Lancuang, Mamuliakan sasuatu nan Hino..
Kicuah, Maubahi nan sabonanyo.
Robuk, Ma ambiak HAROTO urang Jo kekerasan Sangajo cari kabuntuangan.
Tipu, Mambagi urang Jo muluk manih,ateh jalan aniayo, Sangajo cari kauntuangan.
Tepok, Mambaok urang Jo muluk manih saroto patakuk Sangajo cari kauntuangan
Topuak , Malokek an Fi'il, Sangajo manyakiti tubuah urang.
Tampa, Malokek an Fi'il Sangajo mambunuah.mailangan nyawo.
Siuk , Malokek api Sangajo indak Ani ayo.
Baka, Malokekan api Sangajo Ani ayo.
NAMO UNDANG.
1, Undang Putiah tampak Ari.
Ayam Putiah tobang siang,
Tali nyo Auto, tambang Yo Tulang.
Tobang nan dari ikua koto.
Inggok nyo di Kayu nan maranggeh
Basuluah matohari, bagalanggang mato urang nan banyak.
Tidak buliah ma indak lai.
2, Undang Lumpuah tak ba kaki.
Ayam hitam tobang malam.
Tali nyo obuak ,Tambang nyo tanduak.
Tobang Sakotu malam 27.
Hinggok nyo di rumpun pandan.
Kok kotat Tadonga juo, Tak dapek di cokau lai.
3, Undang Bubuang tiado sunyi.
Nan jaek tu malarian diri, Jauh nan ba hambatan, Hampia nan barungguan.
PARJALANAN UNDANG.
Ado tigo parkaronyo.
1, Undang layua malayui.
Basosi ba kato rangan.
2, Undang Suruak ma hangus i.
Baliak bolaha, Panggang ba baliak, Sayiang baleh mambaleh, kok kato ba ulak.
3.Undang tatumbuak KA kubangan.
Si jaek kaputusan tali nan tak buliah lari lai.
BOKEH SALAH .
1,Salah KA PANGULU.
Salah KA PANGULU Mambayia hutang.Tigi parkaronyo.
--Siliah Rugi , Tau diri Jo kasalahan, Mako di jalang TOMPEK ba Salah Iyo nak manyiliah sapatutan, nak manggonti sakik moyang, basi nyo diri kaba sucian.
--Bicaro si pujian Pangka, Tau Atii kasalahan diri, Mako di panggil Datuak - Datuak sanagori.Saroto Datuak KA 4 suku. Dibori minum Jo makan, lah sudah minum Jo makan Mako di buka pambicaraan, Datang Bicaro tarago Ndak di jopuk, Tibo tarago tak tuntuk, Rongkah sajo bak dalimo,
--Sombah ANDIKO.
Tahu urang Jo kasalahan awak, atau awak tau Jo kasalahan urang, Mako di tuntuk Carano diisi Jo Siriah pinang,Di sombahkan KA Datuak KA OMPEK suku, Bahaso Ado nan tatompuah Jo larangan.
2, Salah KA ALLOH SWT.
-- Minyak Ampun KA TanALLOH ,Di ikrarkab dengan lidah , barasdiakan Jo hati
--Di sesali diri akan perbuatan nan lalu, Bahaso indak ba ulang lai.
--Di lahirkan diri , Di nampak kan ja urang banyak bahasinyo Kito olah tobat, Supayo urang Jan subuhat juo di Nagori.
3,Salah KA MANUSIA.
- Basi Jo basi.
Tahu hati Kito bahasonyo Kito Ado kasalahan KA manusia, ban sasamo Islam., Di jalang urang TOMPEK salah , di minyak mooh Godang godang, minyak ampun banyak banyak, banamo baso Jo basi.
--Jamu barunuk , Badatangi urang nan TOMPEK Kito ba salah an , babaik nasi sakatidiang, saroto Jo panggang ayam, sasudah minum Jo makan di mintak ampun Jo maaf, banamo jamu barunuk.
--Dua salamat,
Tahu hati Jo kasalahan diri ,ateh manusia nan sa Agomo, Mako di undang urang nan TOMPEK Salah, saroto alim ulama, Di bori minum Jo makan ,sasudah Bicaro di buka Bicaro KA mujilih ,bahasonyo Elok KA di pakai, buruak KA di buang, KA di anyuk KA ayia ilia,Jo do'a Malin nan sapatah, di luluh KA tanah lokang, di asok jo kamoyan nan ba kobun. BANAMO DU'A SALAMAT.
4,Salah KA RAJO.
tigo parkaronyo.
-- Hukum lobiah borek.
Kobau sa ikua, boreh sa sodang nyo, longkok Jo asam garam.
--Dondo nan lobiah borek.
Diat salapan ratuh hukum, Sakato limo opang.( Tidak usah di palajari).
Takasia lobiah sangat,
Salah tak omuah di hukum, Utang tak omuah Mambayia Karono koreh bak batu.tinggi bak langik, jatuah pado buang nan Onam.
1,Buang bilah.
Buang utang nan indak Salotak satariak, sakato sarugi, Yaitu urang nan di takuti kok indak urang nan KA di bonci, Mako di hukum Jo hukum kurenah.
2, Buang Siriah, Buang kamanakan kapado mamak, Karono mamak aniayo KA haroto pisoko, nan indak mamakai martabat nan Onam, Sipat nan ompek,Dek anak kamanakan ditukuk carano,di isi Jo Siriah pinang, di sombahkan KA majilis Datuak KA 4 suku ,di sampaikan Soko KA Dilipek.
3, Buang hukum.
Sasudah hukum jatuah,utang tak omuah Mambayia,salah tak omuah manimbang, dek koreh bak candi batu, tinggi bak langik,Mako sa olun utang babayia indak di baik sailia samudiak, Baitu Pulo nan Salotak satariak, sakabo sarugi,Saini samalu,sa utang piutang,
Sampai utang babayia KA Nagori.
4.Buang Tingkarang,
Buang salamo lamonyo.
5. Buang Pulus.
Buang di anak kamanakan nan engka pado kanaikan,nan di iarentah mamaknyo.
Indak omuah di kaluajan pagi, di masuk an potang, bak andai kato bida..
Kobau Togak kubomgan tingga
Mati Onau tinggallah Hutan.
Dek Kurenah nan manyongka.
Omeh Suruak KA tambangan.
Baju tasaruang ka nan punyo.
6.Buang bidak .
Urang nan manyatoan salah saroto Tatangkok di kwalat umum, Mako di arak ilia Jo mudiak, di bori pakaian nan indak sapatuknyo, Di anta nan laki laki KA ilia Sahari pajalanan, satahun indak buliah pulang. Di anta nan parampuan KA mudiak Sahari pajalanan, satahun tak buliah pulang.
SYARAT KA GODANG AN SOKO.
Ado 5 parkaro.
1.Godang di Payung, Nasi santan.
2,Godang di Kampuang, Nasi Jo panggang Ayam.
3.Godang di Nagori.
Nasi saroto salomak manih, Jo Kapalo kobau.
4, Godang di Balerong, Boreh saratuh, Kobau sa ikua,Adat ba pakai ,limbago batuang.
LONGGAMAN ADAT.
Adat ba longgam , kitab bawadak, undang batali, cupak balabuhan,
Tibo di adat nan balonggaman, Pocah sasuatu dari pado Adat.
Tibo di kitab nan bawadak, bajalan Jo barobti, bakato nan bakasudahan, Suruah kapado sah Jo bota.
Undang batali nan basosi baka Torang an.
Baa cupak nan balabuahban, Nan kasudah, sudah karojonyo.
LONGGAMAN Ado 4 parkaronyo .
PALITO NAN AMAT TORANG ,POHAN JO ULEMO KENDARAAN NAN AMAT TANGKAS, AKA JO BUDI.PAKAIAN NAN AMAT BAYIAK, FI'IL JO KALAKUAN
NAGORI NAN AMAT LEBA, SOBA JO RELA.
ADAT ,SYARAK, JO UNDANG.
CUPAK BUATAN.
Adat balonggaman, Kitab bawadak, undang batali, cupak balabuhan.
Baa adat balonggaman adolah Pocahansasuatu dari adat.
Baa Kitab nan bawadak,adolah bajalan barobti, bakato basudahan, suruknyo pado sah Jo bota pajarajaan .
Undang nan batali adolah ba sosi Jo baka Torang an .
Baa cupak nan balabuahban, adolah nan KA sudah sudah an.
Pocahan longgam Ado 4 parkaronyo.
1, Ilmu Adat
Adolah mangatahui sasuatu nan basangjutan Jo buruak Jo nan bayiak dalam satiok pajarajaan. Ado 4 parkaronyo 1, Raso, 2 Pariso, 3. Cinto,4. Kiro-kiro
2, Perjalanan Adat adolah Mengetahui bahasonyo satiok-tiok pajarajaan adolah untuak kebaikan dunia Jo akhirat, yakni 2, Syariat. 2.Tarikat, 3. Hakikat, 4.Makrifat.
3. Mukosuk adat, adolah Manuju pado sagalo kabaikan ,1,Nan bajauah Jo ba ampiang an, 2.nan basiah Jo basayang,3, Nan bahukum Jo nan damai. 4. Niat sampai kawua salamat.
4.Poham adat. Adolah Bakahondak pado kasalamatan yakni ateh 1, Kemerdekaan hati, 2.Merdeka Tubuah, 3. Merdeka Tempat. 4. Merdeka Alam.
Merdeka hati adolah Suni dari Utang piutang, Santoso dari Hino Jo malu.
Merdeka tubuah, Sehat samparorono, lolok ponuah kalazatan Jo kasonangan.
Merdeka TOMPEK adolah Bakorong Jo bakampuang, Barumah tanggo, balumbuang Jo barangkiang, Basasah Jo baladang.
Merdeka Alam, adolah Bacupak sapanjang botuang,Ba Adat sapanjang jalan, Budi Namo tompat diam, salamat barang karojo..
Kalau Adat KA di kombang, Syarak KA di Bontang, Ado ompek parkaronyo.
Adat tabatu intan,syarak taujuddulloh,Undang bajalan sandirian.
Adat nan tabatu intan iyolah KOREH JO CEMERLANG, Kok jauah dapek ba tunjuak kan, Ampiang buliah di kakok an, kok Rupo di ruponyo.di Songko Iyo Sangko indak. Jokok adat kadipakai saroto alua kadituruk, koruak sahabih gawuang,kok awak sahabih raso, saposai posai dek ma aliah kulek sahabih tulang,Batenggang sahabih dayo,dayo abih badan talotak, Tibo paham aka baronti, kato putuh sandirinyo, tak manduo cinto lai kok dayo olun abih, Pohan olun Tibo, cinto banyak Pariso, Ragu Budi manunggu, Ka ulemu Pohan ba biisiiak, dalam batin koluah Jo kosah, nosu nan ompek Pocah - nan pindah mangonai basisuruk , -pantang konai, -Tasindorong nyato konai, - batambang KA batang tubuah marasokannyo,-
Pandapek ulemu Jo aja Poham.
Ham Arif Balawan banyak.
Ham Monti mangunyah bangkai .
Ham sungguah Mambaok totap.
Ham syak Cindorong Napi.
Ham Yakin Ulemu total.
Ham Insyaf paham nan oniang.
Oniang saribu aka Tonang ulubicaro, imat dulu jimat kamudian , Condong KA Iyo pandai malulua, bijak Sano tahu di ransam ,Jauhari tahu Jo Poham, si man mati dek kato nyo,sidiq di hati muluk mangato .
Kato kato dalam adat Ado 19 banyaknyo
1, kato Iyo kato baturuk 2,kato indak kato mati 3,kato ontah kato tasangkuk
4,kato basandiang malukoi
5, Kato riang kato topi ayia
6,kato umum kato bonaso
7,kato subhat kato mambunuah 8,kato urang banyak kato bagoluk.
9,kato anak kato manggaduah
10,kato bapak kato pangaja,
11, kato mamak kato kalipah, 12,kato alim kato hakikat 13, kato adat kato nan aman,14, kato pisoko maliputi
15 kato Dubalang kato mandoreh 16, ,kato pagawai kato pang hubuang, 17,kato Rajo kato talimpah, 18,kato pangulu kato panyalosai 18,Kato parampuan Manuruk suami.
PANGAJIAN AKA .
Basi ulik basicekeh, Baliak KA pikia, barimbo KA jonji, Taujuang bakelok, Tanjuang baliku, Aka salukah, Enjong sarajuk, saroto Tongah 30..
Jonjang aka nan 12.
Manihmuluk,Basobayiak,Elok hati,Elok pi'il,Elok kurenah,Cuci tubuah,Cuci pakaian,Cuci tompat,Murah partolongan,Kuek batanyo, Barahi Jo kabaikan, Kuek baguru.
RUKUN AKA
Songsong runuk, Baliak talontang,Marusuak batang, Balapuak surang, Mandindiang kato, Balinduang di nan torang, Cincang ayia tak putuh, Cincang abu tak babokeh
PERJALANAN AKAL .
Bafaedah sagalo kato katonyo, Bafaedah karojonyo, Mulia sagalo jonjinyo, Malu sagalo tolan Jo sahabat, Orek sagalo gonggamnyo, Mangikui parentah ALLOH SWT, Mangikuk pasuruah Rasul, Mangikuk sagalo urang nan mamarentah.
KALIKAT AKA
UJUK, YAKIN,SUNGGUAH, TOTAP.
MARTABAT AKA.
Bausaho, Babicaro,Babalanjo,Basadio.
SIFAT AKA.
Kasih KA Adat Jo agamo, Kasih kapado haroto bondo,Kasih kapado olek jamu,Kasih KA ummat Nabi Muhammad SAW.
Wali ulah aka nan 3.
Suko mamooh an kasalahan,Asa bumi Jo langik Samo rato alam kasamonyo, Marondahan diri daripada urang nan lobiah rondah martabat Yo.
NAMO AKA.
Aka sajongka, Urang lain indak Ado nan lobiah salain Inyo
Aka duo jongka, Urang indak Ado balobuah bakurang mala8nkannsamo.
Aka 3 jongka,indak Ado urang nan talobiah Jo takurang malainkan inyo.
KABOSARAN ADAT DAN KEMULIAAN.
Adolah merdeka Hati, Tubuah,Tompat saroto merdeka Alam.
Mardeka Ati adolah Suni dari utang piutang, ini Jo malu,
Olah bapakaian bagolang baparmato .Urang nyo elek panenan dunia,Urang kato Suko di makan, Dilahia tasambunyi, di batin kalihatan.
Merdeka tubuah, siat lahia bathin, Kok lolok mambori ka lazatan Jo kasonangan,Olah Suko nya tatakoluak di limbagi, bia koreh baitu Jo lunak,Kok jauah buliah di tunjukan, kok ampiang buliah di kakokkan.
Merdeka tompat, Olah sudah Sandan di pakai, olah Suko nan takoluak pado rumah tanggo, Olah tajelo barumbunan, Tampak jauah bakilauan,Nampak ampiang Rupo buliah di Liek,Pariso buliah di makan.
Merdeka Alam.
Sudah Godang pangulu ka Balerong,Godang adat ka limbago, Godang sumpik dek isinyo,bak adat sapanjang jalan, nan ba cupak sapanjang botuang,Dimano sajo tompek salamat barang karojonyo, Kok olah nan baitu,kurang banso mintak ka bapak, Kurang pisoko mintak ka mamak,Kurang SOKO bakondak KA limbago ,tigo parkaronyo
1,Basuriah basipasin. Tobang manumpu ma intan tunggua,Manyongkah dahan, mangopuang Bunta,maningga an losuang Jo maranggai,Mambao adat Jo limbago, Ado gadiang Ado balalai.
2, Tatukiak tak barindang, Inggok mancingkam,inggok manumpu, batunggua batanabuang an batang bapangabungan,kok Pocah tabingka.
3, Soko tasungkuk, Olah dapek ka tiang panjang,kok di basuah barabih ayia, di kikih barabih bosi, indak lokang dek paneh, indak lipua dek hujan,indak lupo dek lah lamo, indak ragu dek lah banyak, kok olah nan sadoan itu bakondak, adat ka dipakai, dilenong cupak nan satu,di livak pinang sadidih,di topuang batu, di karang sumpah sotia, banamo SUMPAH BISO KEWI.
SIFAT NAN TAPILIAH SAROTO LAWANNYO.
Sipat nan tapiliah Manuruk adat Jo pisoko 8 parkaronyo
1, Alim ,iyonyo sifat nan malahia kan Palito alam ayianyo joniah, sayaknyo landai, Mambori suci lahia Jo batin,suluah Bendang di nan rami, tauriah manorangi, Bokeh maniru manaladani, dunia talotak di belakang akhirat sajo nan ba odok i,
Kok ba ulemu kapalang poham, Angan panjang hakikat salah,Rangkok Budi kok kurang dalam, Gunuang tinggi di Songko rondah.
2, CODIAK, Urang CODIAK pambayia utang, utang dunia ba bao ka akhirat nan banyak sangkuk pauk, Duduaklah di adat Jo limbago, Indak pueh dek nan elok, indak posai dek nan rancak, Codiak indak mambuang kawan, Gopuak indak mambuang lomak, kok Kayo Bokeh mamintak, Kok tinggi tompek bagantuang, Godang Bokeh manyanda.
Kok nan kuriak iyolah kundi, Kok nan merah iyolah sago, Kok omeh tak Tan uji, samo lah loyang Jo timbago,
3, Barani , Barani omuah mangalah, Kato ongguak onggak geleng jauah pamandangan,ampiang bayiak pandapek,poganglah bungka Jo naroco, Takuk Karono salah, Barani dek bona, kok panjang makanan korek,singkek makanan uleh, kok indak longkok rukun Jo syoratnyo, sadoan karojo ilang kaleh.
4, Baa nan Kayo, Kayo pamupuh malu,bajuang manontang labo rugi,indak ketek ataupun Godang, indak imat Jo jimat, Rogo satalu Jo sakupang, Rogo sapiak Jo sa omeh binaso Gunuang kasudahannyo, Manuruk cupak Jo gantang nyato manuang ka limbago.kok hanyonindak baitu sawah banyak makanan tak sodang, haroto lah batunjuak sajo.
Pandai, Dek nan pandai Santoso alam, indak mancacek Jo ma inokan,indak ma anjuang Jo ma ontak an, damai ampiang sangketo jauah, urang kampuang buliah kasojuak an,kok indak pandai batinggang di mabuaknyo..
Kok manih Jan langsung di lulus,Paik oncik lansuang di luahkan,Kok batuka dek maukua,Makang kok senjang manggonok an.
Baraka, Baraka sagalo sampai,kalauk indak barombak, KA Padang indak barangun,olah batompi ba indang ngi,olah Torang ba kolami, Iyo sabuah jalan tompek lalu,sapuluah jalan tompek suruk, Kok Lia jadi jinak,jauah jadi ampiang,kok tinggi manjadi rondah, Tibo di sulik jadi mudah,nan ghaib dapek dek aja, dek merdeka salamat tubuah, bumi Sonang padi manjadi,umur panjang rasoki murah, pa abih sagalo uweh uweh nan tak panjang angan².
Longgam adat dalam torombo,Dapek pikia dalam raik, Dek Arok langkah ta jombo, Dek comeh budi marangkak /tasingik.
Bosa Batuah .nan basifat longkok,aka banyak elemu banyak, pikia mandalam sarupo alam, kok pandai mamakaikannyo urang kampuang dapek kasojuak annyo, kok indak pandai Mambaok kannyo urang kampuang ba pantiang an, Jalan baronti kato basudahan .dek padoman pado alam kok Poham orek nan lah lungga, Bumi cayia, Iman tanggolam.
Tapiliah ,4 parkaronyo.
Raso pado ayia, Pariso pado tubuah, Cinto pado tubuah,Kiro² pado ulemu.
Sangketo pado tubuah,tunggangan pado nyawo, pituah urang pandai,elok Kito paraduan, Kurang Budi tarabo rabo,Kurang lemu parolu suluah,ba dek baitu, kok Bicaro kurang kapalang aja, balemu kapalang poham ,bapikia ukan ba angan angan, Atikat salah aja sampai jonjian Tibo, Di akhirat makonyo tontu.Alloh ta'ala nan mambagi an.
LAWAN DEK SIFAT NA TAPILIAH.
Aluma toluak itiak ,Putiah di lua. Kuniang di dalam.
-Aluma kancah, , Kok tumbuah silang Jo sangketo, kok mangaju sapanjang syarak, di jalang lai basuo, di panggiia lai nyo datang, Tapi di imbau tak babunyi,golak tasrngeng urang nan banyak, awak rintang dek ongguak² sajo.
Aluma lincah,Tak Sonang diam di kampuang, tak Suni Dian di Nagori,, bak di angin parotian di pusiang kiro², Olah malauk nak mandarek,olah marantau nak mamulau, Ibarat urang baniago,di Mano layia nan eloknya disitu ambek annpoham kalua, kok kurang omeh di pinggang, Muko nan indak ba minyak lai.
Aluma pamocah,Tampang logat di tanah mokah, asa uruh di tanah arab,kalimah datang dari Alloh, hadist nan ompek dari nobi,itu kalimat nan maklumat,itu pogongan aluma nan da ulu, banyak Bona nan kiramat,di Maso iduk jadi pogongan, nyato di akhirat ka tumpangan, Itulah hadist Jo Dolia nan barisi Kalimah, nan vatuntuk dek ulama pamocah nan kuek di da'if nan kadim di jadikan nyo,
Kok di ontam ka kuburan , di kopiang batu mejan,ka parombak Aluma nan pamocah poham urang banyak,bia Badoso indaklah Baa, Tuhan Alloh manjadi sosi, asa lai koruah ka joniah, kusuk ka salosai.
Aluma paroncah, Bakato lidah lai indak bagolang, bajalan kaki indak barenjeng, kodok taroncah di nan bukan ,tatariak Jo untuak urang, di syarak nak jadi nobi, di adat nak jadi pangulu Pulo, di dalam nak jadi Rajo, Iko banamo Malin basobab ,
Barobah barundiang marangkok rangkok, bakato marawak rawak, ,nan di urang nan bakakok ,marisk indak KA miliak awak.
Aluma latah boncah, Toluak sarok timbunan latah, Suko mangoja parampuan, hawo naposu indak bakunci, ikuk setan nan bamusuhi, pueh makangjah ilia mudiak,masuak korong kalua korong, Golak manih bak santan tangguli, gulo di Bibia , Coliak Mato indak lah manunggang,dek elok surah pangajian, lokek tiliak nan duo surah, lahia Jo batin nan lah sasuai, badotiak tubuah anggoto badokokan, Iman ponuah nan tagendeang, Cupak usoli mambuang boreh kasudahannyo, bagandiang itiak Jo ayam, sapandai² manyuruak busuak Jo anyia, lamo Jo lambek tabaun Jo tasinga juo KA Nagori,mangecek urang dalam kampuang, ma orang panjang kasamonyo, lah golak urang nan boji, manangih urang nan sayang, dek Codiak bakalampauan.
Codiak bakalampauan limo saumpamo.
Codiak banso lintah, Codiak bagotah, Codiak pamatah, Codiak pambantah, Codiak tamakan Jo atah.
Codiak banso lintah, Manjontiak ilia Jo mudiak,malayok suok kida,Tubuah lomah orang koreh, licin nan akang kapalang , manyosok darah urang sajo.
Codiak bagotah, Angan² siang Jo malam,Ba a nak murah mancari rasoki, karojo indak mancari nan ala,asa Puro lai kabarisi, di tahan jaruang Jo pukek, asa gotah lai KA mangonai, indak mangina itu eten, indak paduli Jo urang awak, itu sajo pang hidupannyo.
Codiak pamatah , Isi Kapalo asa lai KA manukuak.asa nosu lai KA iduk, asa anak lai KA makan ,indak mangina elok buruak, indak mancinto nya bayiak, Tibo di nan lunak di sudunyo, Tibo di landai di titihnyo,kok utang indak omuah Mambayia, abih akan jambatan untung di putuhnyo, Enggeran Bokeh ka jamban.
Codiak pambantah, Sungguah pun Bona dek nan urang, saketek di bantahnyo juo, Asa indak dari Inyo bapantang karojo kalalu,Suko mangecek di belakang, kok indak dapek Caro Inyo omuah ba bantah sampai bacokak,nomuah badindam bakasumat, tapi kok dapek caronyo, nomuah barugi bajarojo kalua poluah .
Codiak Tamakan Jo atah, Awak sianu Jo nan awak,Ndak tahu Jo diri, pancupak asam garam urang, sagantang balacan baulek di jujuangnyo, iduk co udang nan indak tau Jo bungkuaknyo racirik ateh Kapalo, Iyo bak manompi ampo borek ,usah boreh nan KA basuo, abunyo sajo KA dapek, dek indak pandai ma indang tamakan boreh ba atah KA jadinyo.
AMBIAK MUKO, MA ANGKEK TOLUA, BAMULUK MANIH.
5 Parkaronyo.
1. Barani buruak, Bak ibarat kudo sawah,ikua kucuk Kapalo rondah,, basan singkek talingo congang, jalan sompik lari manyimpang, orang koreh awak oanyipak, ba Bona KA Pangka longan , Suko ma arih arih musuah.
2. Barani Boruak, Panggarigak pancibia an urang, kok nampak urang KA nanolong lobiah Bona parangsang nyo, kok talobiahnyo ma ambiak Muko nomuah jadi budak urang, olah pueh bakarojoi , ba Ota dek urang Inyo indak barubah juo.
3. Barani manyuruak. Nan ba api dalam sokam, di lahia indak mangosan di dalam ati ancua luluah, Saketek ati nyo sakik, kok Ndak siang banantian malam, nan parolu Sakik ati tasampaian, pandondam.
4. Barani mairuak, Kuek batongka, bacaran, baporang porangan muluk, Kalau di Muko nan Basamo bakumpua tompek nan rami, baguluk bagalusang, muluk tajam, kok batongka Jo nan lain bakalan sajo urang Jo muluk sajo, barani Jo Suko ma ambiak Muko.
5. Barani koruak mangoruak, Sodang lolok Mato manceleang, kok indak di Muko urang nan tajombi nak manariak, nan tacuai nak ma elo, Malam bajalan ilia mudiak,basi awai ba sirusuak, inggih tolua ayam ka ATEH, olah di nasehati Jo di pakatoan Maklum pulang ka nan pandai, lah bataruak Jo barong kah , lah manih tigak Jo nan bak kian, akhia dari nan sarupo itu Namo Jo Gola lah di tukang urang. Kini banamo si RUNCIANG TANDUAK, banamo si BOBGKAK KONIANG..
KAYO JO BAKHIL Dalam adat MINANG KABAU, Di Koto Baru Simalonggang.
1, Kayo malelang,
Korong Jo kampuang tak paduli. Rumah tanggo tak ba acuahkan, Rintang malenggang ilia mudiak, bajalan kiri kanan,dari Sahari KA sapokan, dari sapokan babilang bulan gonok samusim uncanglah sarek, Siriah koduak nan lah ponuah tapi sumatangpun baitu. Bakain miang tak tadindiang, Baromeh malu tak ta Tutuk. Iduk ka tuo bak upiah, kok Tibo ngilu saroto poniang. Kampuang lah lamo tak bajalang , Iduk bak gurindam lamo.
Singunai bulunyo toduang,Iduk tapauk di Kandangan ,Sayang Jo Piti Tingga an kampuang. Kamanakan nan buliah dek parunduangan,
Loloklah bajalang pusoko, Pituah guru Jan sakali lopeh,Sungguahpun batang olah merdeko, Ingek PUCUAK kok ta ompeh,
Adat lah nyato balimbago,Cupak nan tak buliah balimbak , Syngguahpun daulu lah nyato Manisan niro, Kini kok olah jadi asam tuak .
2. Kayo Jalang.
Bak cando tobek jolong ba isi,bak lonjak kilangan tangga, Takuk Bona dek karugi, Arok dek kalabo,si Kayo bapantang usak, si Lai bapantang susuk, Kayo nak batukuak-tukuak, Dunia koreh Puro bajaik, Nosu Godang Lapa batahan,, Zakat fitrah indak bapakai, basidokah sakali tidak baragiah, itulah Kayo Jalang, Kayo satangah bakhil.
3, Kayo bungkuak Kelong, Kayo dek Lobo Jo tamak, Mamboli indak Jo harogo. Mamintak indak Jo Suko, banaroci bungka ganjia bataraju lobiah kurang, bagantang Jo Bacupak duo aso, galeh Godang labo ringansajo manyobuk sumpah, indak malu sombong Baduto ,
Ati urang jadi palopah Tiok bakato galik basumpah, Mandapek duto indak Jo upah Di akhirat nariki malampah.
4. Kayo indak Suko nanolong. Kok tumbuah susah Jo sompik, nak batinggang, nak bagantuang,nak Manyolang,nak Bautang, banyak kilik kaliciaknyo , kunci pa tuah puro jauah. Muluk manih basonyo bayiak, manakiak gotah Jo aku, mancari badodi di bukik urang, , nan masikin Arok pulang manangguang ibo sajo, Kayoindak ba paedah, Manuruk adat Nan Kayo cahayo dalam Nagori.
Basakik jadi pangulu ,Nan murah Iyo barundiang,Basakik nangginggam hulu,Bak korih patah puntiang.
Bak Antimun panjang sajongka, Saetik panjang buahnyo, Di ambiak kini dimakan kapotang,Salembari dapek parisonyo.
MARDEKO.
1, Mardeko salamat tubuah.
Tubuah sehat badan salosai, Bumi Sonang padi manjadi Pandai maagak Jo ma agiah,
2. Kamanjadi lawan dari mardeka salamat tubuah Mardeko Sogan maleh.
, Cando mardeka tampak dek urang, sogan maleh co kambiangdi baik mandi, awak bansaik sarupo Kayo, sihino sarupo mulia, indak omuah ba susah payah, Kok kecek kuntang kantuang, bak katoban bumi Alloh,galik tapokiak Jo tarorau, bak setan maruntuah bukik, kok madok KA badan tubuah, lomah tubuah tak sehat,urek Jo tulang baganjaran, lobiah lolok dai oaso jago, panyogan jago pagi pagi rugi sakorek Ari, Jangguk Jo sunguk bapa elok, bulu iduan indak paduli.
3. Mardeko dek coleh.
Basirutu, Basikutu, Basirungkuk, Basilalai, Maarok urang sajo,Tarotik bak harimau domam, lalu Puyuah di rangkok NYo juo.Kurang kurang saketek asa lai KA mardeka, nomuah Manahan awuh Jo Lapa, Lolok baduo nak di tongah Sairiang nak DA ulu, Sogan kok balobiah Jo bakurang, Baragiah Godang ka awak. Nan di urang di pasamo an, nan di awak Sonang sajo, Codiak buruak Mardeko bingung, pagaran mamaliang tinananannyo, Iduk kok co itu akia kolak kadian bakulek, bak anai² ba angan² andak tobang ka manggiriak langik, olun sampai tobang ka ATEH iduk Makang di semba layang².
4. Mardeko sumpah puleh.
Bacandi KA indak, Basiloyo lomah indak patah, Sakik Kapalo panjang obuak, Patuk ba silero makan, pisang masak indak, lalu pisang Mudo di ragehnyo, Nasi lombiak tak takunyah, korak anguh copak cimpuang, Basamo bakayo Kayo, lah Sorang di puleh nyo, itu sipat kucing Lapa, Muluk manih bak manisan,lomak nasi bak raso santan. Nan kok raso pisang masak ,bak tangguli ayia tobu, Usah lah Kito picayi i .
Kok maawai sa abiah raso, kok mangoruak sa abih gawuang , Kok Adat nak NYO SANTOSO, Simpanlah Mato KA dalam saruang.
5, Merdeko ilang laleh.
Awak Sonang tak buliah diam, Badiang lobiah bak ta panggang, Baomeh Bautang banyak ,Bapadi mamboli boreh, Lumbuang ponuah makan tak sodang , boreh di jua maso murah, Awak cukup solang solangi , Cilako nan babuek, buek, Dek banyak baribu sumpah Tubuah sehat sarek di adang adat nan ba pakai. Pituah syarak tak paduli. Kok baguru jauah sakali, omeh Jo perak tak paguno, sawah ladang tak ba paedah, Jayo KA ilang laleh sajo.
6. Mardeko sapanjang tali galeh, Indak mangona awa Jo akia, Tubuah sehat badan salosai tiok mukosuk lalu sajo, Tibo malang adang adangan, elok Jo bururuak galik tumbuah, maso sehat mabuakndek lenggang ,Tibo di Sakik apolah tenggang, Maso Mudo omeh di pinggang, Tibo tuo badan basinggang, Godang pasak dari tiang, masuak ompek kalua limo, poi nyo banyak datangnyi saketek ,aja Budi indak badaun,PUCUAK di gonteh kambiang, urek tajelo tapijak urang nan lalu, indak ba bunggo tumbuah marando, makin lamo batambah suruk, Iduk bak lintah dalam timbakau, bulakang nati dek bagaram, nasi matah gulai tabuang,pisang busuak tobu dek ulek, galeh abih tali takumpa, pokok licin galeh tandeh, Sawah tapocik dek urang Kayo, ladang tagadai Samo awak ,ban bajua lah di boli, nan di agiah lah ba mintak , dek Kayo lah mangalupak, itu lah akhia nya tajadi.
BOSA BATUAH.
Sifatnyo longkok akanyo cukuk , Pikirannyo man DA ulu an ambo rakyat kalinduang an, kok indak omuah nan ba itu ,kapenting an ambo rakyat bada ulu an. Nak Jan anguh bak baka.
Limo parkaronyo.
1, Bisa Batuah todiak pinggang.
Elok Jo rancak tompannyo sudah bacomin, tagantuang bak padoman jolong sudah. Ilia Jo mudiak kiri kanan di gilo KA rancak an, bak ayam Godang di lopeh, Adat nan kewi jadi lomah, syarak nan lazim indak totap, Rajo jaek hati NYo tinggi, tobek indak ba panyawa pagaran Bosi di rompaknyo,kok baitu nan tajadi Adat ilang syarak tak laku, Urang Dagang jadi Rajo ,Kampuang ancua adat binaso, Nagori kacau balau.
2. Bosa Batuah bak pinggang.
Aka jaek pikiran busuak , budinyo Monang, pohamnyo anyia. Umbuak lomah tipuan manih, kok lalu tipuan Aceh takonak gurindam barus, bamain tangguak malayui, Alamat Nagori andam karam. Nan baranggah di lalehnyo, nan ba isang di patahnyo. Sado nan Kayo KA manjadi miskin, namcodiak KA bingung ayam batali KA di lopehnyo, Tontu Adat nan ka binaso.
3, BOSA BATUAH Tunggang langgang,
Ati bosi pikiran batu, aka damak poham piliru, tanggung ilang barani mati. Kok Bona sagiriak bapanggang,hukum bak mambolah botuang kok angan tak balintang omuah ba dondam Jo baka sumat, Suko mambunuah anak buah. Pado iduk bacomin bangkai ,omuah mati bakalang tanah, muluk babiso lidahnyo apiak, bak doja mani ayo ummat , ma anguh baka dalam Nagori. Sungguah pun baitu. Balasan totap KA nan malakuannyo.
Bajalan bsgogeh gogeh nak Jan talendondi urang banyak. Kok salah Jan ma ngoruk, Nak sayang urang Jo awak.
Kok bakato di dalam barih. Barundiang didalam alua, Ingek Ingek nan lomak manih. Paik nan usah Kito luahkan.
4. Bosa batuah tak maninggang
Kok kecek lomak lombiakIndak manenggang ati urang. Kok adokarojo nan borek anak buah manangguang kannyo, ambo rakyat nan mamikua, Indak posai manyi rayo. Indak malu mintak tolong, sakali sapokan indak kurang, sosak Jo sompik indak paduli. Bansaik Jo miskin indak di sibuk, sulik indak buliah takato kan, kok parintah baturuk juo. Itulah Rajo Lobo Jo tamak, Sombah tunggang di ilak an, salah saketek di hukum nyo, langik runtuah bumilah cayia, lah sokah tompek bagantuang Nagori indak kasalamat lai.
5, BOSA BATUAH Kilangan magang.
Sompik ongok Bokeh diam, utak batu dadonyo sosak , tangguli Jo ayia lado di minum , bak tapi masak sabulan,samba apiak Tongah taun, dek anjuang indak ta makan dek kucing indak ta jilek, rundiang bak pitih tongah hari, Tiok sasuatu Jo bilangan, tiok sabuah jo ba laliak, bungkuak saeto lai manyusah apokoh kok bilungjuak sajongka, satuntuang tobu baulek sabarang di buangnyo.saikua kobau bakubang sakampuang konai luluak nyo, Sorang nan mambuek salah sakampuang di hukumnyo .pohamnnan indak pulang baliak, lalu lalang landak sajo, ba sondi KA Awang Awang, ba bonaj KA ampu kaki , baroreh KA Ujuang dahan, ba sisi KA Ujuang tapak, mahukum sakondak hati. Kok tampak barang mamalintang, kupak di patah tobu, kok Ado dahan nan ma ambek dahan di sokah bapalituak an, Bona indak suruk lalu, Indak nangina Tuhan Alloh. Indak Madok KA urang di nagori, Urang banyak bahati comeh , bahati takuk bak ayam Mandonga Olang, bak moncik di Muko kucing, bak kambiang dalam panjaro, Godang ketek tuo Mudo,laki Jo parampuan, di sosoi untung Jo bagian, kobau nati bantuang ta jua, ladang simak sawah tak manjadi, padi ampo paneh sataun, rumah runtuah rangkiang tumbang, kampuang manjadi Rimbo rayo, Nagori manjadi somak baluka, azab di dunia indak tatahan , bak raso masuak naroko iduk iduk. Padi diam ateh dunia elok balalu KA akhirat.
Akia Kalam nan batulih, di Sakotu Iko kini, Iyo bak kato Tambo juo.
Barundiang di dalam barih, bakato di alua Jo patuk, kok batanam di dalam paga,
Nak elok salendang dunia, nak ulam PUCUAK manjulai, nak ayia pincuran tobik, Nak licin cahayo mandatang, Nak aluh kilek lah Tibo.
Kok gantang di bodi caniago. Cupak di koto rang Piliang, Dunia abih kiamat Tibo, Lobuah Luruh jalan basimpang.
Limbago jalan batompuah, Itu NYo karojo niniak mamak, Sarugo dek iman Toguah, Naroko dek laku awak,
Tinggi ba balai kok tapancuang, Panjang tajelo kok ta korek, Masuak an Mato KA dalam saruang, Gonggam lah ulu orek orek.
Pihak imanat nan lah sudah, Ulemu di situ di putusi,
Lahia Jo bathin kok barubah,
IDUK DI MAKAN SUMPAH BISO KEWI
KATEH INDAK BA PUCUAK, KA BAWAH INDAK BA UREK, DI TONGAH DI GIRIAK KUMBANG, IDUK SOGAN MATI TAK OMUAH BAK KARAKOK TUMBUAH ATEH BATU.
NA'UZUBILLAH MINZAALIQ.
Penulis mintak maaf nan sagodang KA hadapan Mamak kasadonyo, Mintak ampun ka ALLOH nan Qodim.
Bak andai mamak juo :
Tobik luko dek pisau tajam. Luko nampak badarah darah. Duo tigo ubek panawa ,Dek PUCUAK ubi sehat juo, .
Tapi luko dek lidah tajam , Nomuah mandonyuk ka ubun², luko di lua indaklah mangosan ,namun di dalam romuak rodam, bak umpamo kain balipek ,di lua lipek tak mangosan di dalam ragi cayia manggaradai .
Mancampak nan kaduo
Mancampak nan katigo
Mancampak nan ka ompek
ADAT DALAM KESEHARIAN.
PSIKOLOGI
Pituah ka nan mudo
ALUA PASOMBAHAN
Martabat nan onam
NINIAK NAN BAROMPEK
Nan Ompek
8 SOBAB MAMBANGUN SOKO
FALSAFAH ADAT
ASAL TUAH
Tompek salah
LARANGAN NAN OMPEK
Cemo
SOMBAH ANDIKO.
PUCUAK TINGGI NAMPAK JAUAH.
TALI TIGO SAPILIN.
NAGORI KOTO BARU SIMALANGGANG.
wEB SITE NAGARI KOTO BARU SIMALANGGANG.
AHLUS SUNNAH WAL JAMAAH Dan bedanya dengan MUK TAZILAH
Penulis blog ini
Usaha Penulis.
SARAN PENULIS
Akia Kalam nan batulih, di Sakotu Iko kini, Iyo bak kato Tambo juo.
Barundiang di dalam barih, bakato di alua Jo patuk, kok batanam di dalam paga,
Nak elok salendang dunia, nak ulam PUCUAK manjulai, nak ayia pincuran tobik, Nak licin cahayo mandatang, Nak aluh kilek lah Tibo.
Kok gantang di bodi caniago. Cupak di koto rang Piliang, Dunia abih kiamat Tibo, Lobuah Luruh jalan basimpang.
Limbago jalan batompuah, Itu NYo karojo niniak mamak, Sarugo dek iman Toguah, Naroko dek laku awak,
Tinggi ba balai kok tapancuang, Panjang tajelo kok ta korek, Masuak an Mato KA dalam saruang, Gonggam lah ulu orek orek.
Pihak imanat nan lah sudah, Ulemu di situ di putusi,
Lahia Jo bathin kok barubah,
IDUK DI MAKAN SUMPAH BISO KEWI
KATEH INDAK BA PUCUAK, KA BAWAH INDAK BA UREK, DI TONGAH DI GIRIAK KUMBANG, IDUK SOGAN MATI TAK OMUAH BAK KARAKOK TUMBUAH ATEH BATU.
NA'UZUBILLAH MINZAALIQ.
Penulis mintak maaf nan sagodang KA hadapan Mamak kasadonyo, Mintak ampun ka ALLOH nan Qodim.
Bak andai mamak juo :
Tobik luko dek pisau tajam. Luko nampak badarah darah. Duo tigo ubek panawa ,Dek PUCUAK ubi sehat juo, .
Tapi luko dek lidah tajam , Nomuah mandonyuk ka ubun², luko di lua indaklah mangosan ,namun di dalam romuak rodam, bak umpamo kain balipek ,di lua lipek tak mangosan di dalam ragi cayia manggaradai ..
WASSALAMU'ALAIKUM WAROH MATULLOOHI WABAROKAATUH.
####################################
https://www.google.com
-
Komentar
Posting Komentar